terminally ill for a couple of weeks

ég þarf vottorð frá lækni uppá að ég sé að deyja úr krabbameini eða einhverju þvíumlíku. síðan ætla ég að liggja uppí rúmi í þrjá mánuði og láta fólk stjana við mig og passa börnin mín. þangað til mér batnar skyndilega og verð læknisfræðilegt undur vikunnar.

pabbi og mamma eru hérna að passa stelpurnar á meðan ég ligg uppí rúmi og hvíli mig til að mér fari nú að batna bráðlega. pabbi vippaði einhverri dásemd úr ítalska eldhúsinu fram úr erminni áðan. fáránlega gott þó ég finni eiginlega ekkert bragð.

obbosí, kúkableyja. getiði hver þarf ekki að fara á fætur til að skipta...

ég vil ekki að þau fari.

búin að panta pláss í klaustri

eldri dóttir mín, sem verður 10 á árinu skráði sig inn á barbiegirls.com í gær undir nafninu asdisran.

öskudagur í ljósi avatar

allt, allt of margir hálfnaktir ólögráða navistrumpar munu reika um bæinn

moggabloggið

kíkti aðeins inn á það og sé að ég verð að taka mig töluvert á; ég nota aldrei broskalla. sumir nota broskalla á eftir hverri málsgrein, jafnvel lítil hjörtu.

sýnið biðlund, þetta skal takast.

tískuráðgjöf

íslenskir karlmenn og bissnesskarlar að utan, takið eftir!

já, smart flíspeysa, sérstaklega frá 66 ways to rip you off, við þunnar, flaksandi jakkafatabuxur með broti er bara sexí.

haldið þessu áfram strákar.

avatar: loksins

er ég búin að sjá hana og get sagt ykkur að spara þrettánhundruðogfimmtíukallinn ykkar.

auðvitað varð maður að sjá hvað er svona merkilegt við þessa umtöluðu þrívídd, en eftir 10 mínútur langaði mig bara til að fá að deyja strax úr heilablóðfalli frekar en að þurfa að sitja lengur undir þessum pínlega söguþræði, hallærislegu klisjunum og blygðunarlausa pólitíska áróðrinum.

gubb.

það eru samt einhverjir ósammála mér.

(get samt tekið undir það að maður verði þunglyndur af þessari mynd)

og svo var ekki einu sinni kynlíf! (nema ég hafi dottað)

frétti samt að það kosti fimmtánhundruð á mömmmu gógó og hún er ekki einu sinni í þrívídd.

leim.

en þeir eru ekki allir eins!

ég á við nýtt vandamál að stríða tengt fréttalestir. þið hafið öll (mamma, móa, ragna þorbjörg og maðurinn sem ég borga fyrir að lesa þetta drasl) fræðst um fyrirsagnamislæsisvandann minn og nú er ég komin með aðra en samt sem áður skylda fötlun tengda fréttainntöku.

ég er búin, eins og allir aðrir í vestrænu upplýsingasamfélagi, að fræðast meira um kynhegðun tiger woods síðustu 3 vikurnar en ég hélt að væri mögulegt á ekki lengri tíma. 48 hjákonur plús mellur plús kynlífsdúkkur plús hjálpartæki auk lyfja og sleipiefna.

gott og vel.

tiger woods og graðpinninn hans eru tattúveraðir í skammtímaminnið.

vandamálið?

alltaf þegar ég les frétt um obama þá hugsa ég tiger. báðir múlattar, að vísu. en þeir eru ekki einu sinni líkir!

dæmi um frétt:

"obama tekur við friðarverðlaunum nóbels næstkomandi vikudag"

dæmi um gallaðan heila að störfum:

"þeir mega eiga það þessir norðmenn að þeir eru nú ekki eins miklar pempíur og ég hef alltaf haldið. láta sko ekki smá kynlífshneyksli slá sig útaf laginu. töff."

frétt:

"obama leggur fram frumvarp um breytingar í heilbrigðismálum"

bilaður heili:

"nújæja, það eru þá ekki allir bara að einblína á þetta framhjáhaldsbrölt hans. ég meina, maður getur nú haft eitthvað fram að færa þótt maður sé kynlífsfíkill."

etc.

og nei, þetta virkar ekki í hina áttina.

ætla ekki einu sinni að reyna

þessi sprelligosi hann tiger woods hefur fengið meira á broddin síðustu fimm ár en meðalmaður fær alla ævina.

þurfa atvinnumenn í golfi aldrei að æfa sig? nema þá í ríðingum?

ég á aldrei eftir að fá að sofa hjá jafn oft og tiger! ekki einu sinni þótt hann missi tippið á morgun og gangi í klaustur og ég dembi mér í þetta verkefni strax í dag.

létt spjall við kærastann

ok, ég þurfti aðeins að spyrja kærastann minn um svolítið hérna um daginn vegna þess að þótt ég viti margt þá veit ég ekki allt um kynfæri karlmanna.

ég er að vandræðast með þessi brjóst mín og velta mér uppúr því að konur þurfi að dröslast um með eitthvað sem lafir utan á þeim og er til vandræða þegar þær vilja skokka og bara almennt fyrir þegar ég átta mig allt í einu á því hvað karlmenn eru líka ógeðslega óheppnir. þeir eru með pung og typpi hangandi á milli lappanna!

það er fáránlegt!

ég vil miklu frekar vera með þessi brjóst en að þurfa að hafa eitthvað danglandi á milli lappanna. dísös, hvað það er örugglega pirrandi. ömurlegt að setjast óvart á punginn á sér, eða jafnvel typpið ef maður tilheyrir einhverri örprósentu. ég þarf yfirleitt ekki að laga brjóstin mikið til í haldaranum eftir að ég er búin að koma þeim fyrir en maður sér oft til karlmanna þar sem þeir eru eitthvað að bisa við að koma þessu aftur á rétta staði og það er alltaf jafn bjánalegt.

það var s.s. tímabært að hætta að vorkenna sér.

en þá fór ég náttúrulega að hafa áhyggjur. ég geng í brjóstahaldara til að halda brjóstunum á sínum (fyrrverandi) stöðum en kærastinn hann er bara í nærbuxum. hann á ekki einu sinni punghaldara. ég vind mér því að honum og spyr hvort hann hafi ekki áhyggjur af því að fá pungsig ef hann er alltaf bara að skottast um með þetta allt lafandi. eftir tvær barneignir veit ég nefnilega allt um það hvernig húð bregst við lögmálum þyngdaraflsins. hún bregst ekki vel við. hún er bara alls ekki að höndla þessa eðlisfræði.

allavega.

við sitjum þarna, ég með mínar áhyggjur af framtíðarpungsiginu og hann mæddur á svip með bókina í kjöltunni. (já, ég er ógeðslega leiðinleg týpa sem er alltaf að spjalla við fólk þegar það er að lesa) og við förum yfir þessi mál, af hverju punghlíf dags daglega er ekki málið því þá verður litlu sáðfrumunum of heitt og að pungsig á efri árum herji alls ekki á alla karlmenn o.s.frv. svo fæ ég í kaupbæti stuttan fyrirlestur um það hvernig pungurinn hagar sér. takk fyrir það. nei ég meina það, takk í alvörunni. vegna þess að ég hef aldrei kynnt mér það mál. núna veit ég svo miklu meira um punga. og eistu. og bara allt sem ég vildi vita.

og ég gerði mér grein fyrir því hversu takmarkaðar fræðslubækurnar sem ég hef lesið um typpi eru. þær fjalla allar bara um getnaðarlimi þegar þeir eru upp á sitt besta og sleppa algjörlega að fjalla um typpi í öðru ástandi en gagnlegu. allur minn fróðleikur er eitthvað á borð við:

"Tex sveiflaði Dawn uppá fákinn og tyllti henni fyrir framan sig í söðulinn. Dawn fann vel fyrir grjótharðri bungunni í buxum hans og hún kiknaði í hnjánum."

"Dr. Robert gat ekki leynt bungunni á læknasloppnum og Cindy fann hvernig hún varð að smjöri í örmum hans." (vonandi kann dr. Robert lækningu við þessum hræðilega smjörsjúkdómi)

"Blóðið ólgaði í mjöðmum Cash þegar hann bar Brandy upp stigann." (kærastinn minn nennir ekki einu sinni að halda á mér úr sófanum uppí rúm. það eru ca. tveir og hálfur metri. hann heitir heldur ekki Cash.)

"Það leið næstum yfir Samönthu þegar hún sá púlserandi og æðaberan liminn. Ræð ég við þetta? hugsaði hún með sér í örvæntingu."

hins vegar hef ég aldrei lesið neitt í þessum fræðslubókum mínum á borð við t.d. þetta:

"Þegar Lucy stakk hendinni ofan í gallabuxur Crawfords eftir að hann hafði bjargað henni uppúr ískaldri ánni fann hún hvernig typpi hans var á stærð við kokteilpylsu, pungurinn skroppinn saman og eistun nánast gengin aftur upp í líkamann. Crawford horfði blíðlega á hana og sagði:"Æ, ástin mín, kakóbolli og arineldur reddar þessu.""

aldrei.

fyrir þær sem lesa mikið frá Ásútgáfunni þá mæli ég líka með alfræði um mannslíkamann. bara svona til að koma ekki af fjöllum á fertugsaldrinum.

með eða á móti?

hah!

loksins er ég búin að finna hina fullkomnu lausn á þessum "nenni ekki að kynna mér málin og veit þar af leiðandi ekki hvort ég á að vera með eða á móti" vanda sem hefur hrjáð mig síðan ég hætti að fylgjast með fréttum fyrir tæpu ári síðan.

já, ég valdi besta tíma í veraldarsögunni til að gerast ópólitískur vanviti. ég veit, ég veit. nenni samt ekki að hlusta á tuð og svo er ég enn með kosningarétt þannig að hí á alla sem þetta fer í taugarnar á.

allavega

besta leiðin útúr þessu er að gera ekki upp á milli, vegna þess að þegar maður er óupplýstur þá hefur maður ekki næga þekkingu til þess að velja og hafna, heldur á maður bara að vera bæði með og á móti. þá getur allavega enginn sakað mann um að standa á sama.

núna er ég t.d. búin að kvitta undir indefence undirskriftalistann til vindhana Íslands nr. 1 (órg) vegna þess að mér var sagt að gera það.

algjörlega að taka þátt í lýðræðinu. verð sko ekki sökuð um annað.

barnakast - síðustu forvöð

við vorum búin að bóka farseðlana okkar út til Karnataka og tengiliður minn úti segir að við ættum að ná rétt áður en lögin taka gildi.

hjúkkit.

glatað samt ef maður eignast fleiri börn. þetta er algjörlega öruggasta leiðin til að tryggja fólki farsæld og langlífi.

Ungfrú Ncogo

ég er svo aldeilis rasandi hissa. maður hefði nú haldið að Catalina okkar Ncogo myndi sjá sóma sinn í að sitja auðum höndum, skammast sín og bíða róleg eftir því að mál hennar kæmi fyrir rétt eftir að henni var sleppt úr gæsluvarðhaldi.

jahérnajæjajá

(ok, í alvörunni hvað hélt fólk að kerlingin myndi gera, taka þátt í prjónabyltingunni fyrst þetta vændis- og mannsalsbrask gekk ekki upp í fyrstu tilraun?)

hafiði annars eytt smá tíma inni á moggablogginu? ég hef aldrei orðið vitni að öðru eins ofhrósi, fólkið þar virðist hreinlega þrífast á að oflofa hvert annað og missir sig í blætisfullum og algjörlega innistæðulausum hrós-, oflofs- og samúðarköstum.

pervertar

believe you me

ég hef prófað þetta þarna jólastress dæmi og það er svo ógeðslega leiðinlegt að ég nenni því ekki aftur.

þar af leiðandi verða þessi jól þau metnaðarlausustu í manna minnum. hér á eftir er upptalning á því sem ég ætla ekki að gera fyrir þessi jól:

1. þrífa betur en venjulega (bara basikk fyrir helgi tiltekt allir hér eru ónæmir á skít og við fáum enga gesti)

2. falda gardínurnar sem eru of síðar (sést ekki utan frá)

3. búa til jólakort með ljósmynd af stelpunum til að senda fólki (ef fólk man ekki hvernig þær líta út þá á það ekki skilið að fá kort yfirhöfuð)

4. senda jólakort yfir höfuð (vinir mínir vita að ég elska þá jafn mikið á veturnar og á öðrum tímum árs)

5. föndra neitt til að gefa (fólk hendir því bara!!!)

6. elda eitthvað nýstárlegt (lærði mína lexíu af saffranhunangsvanillu ísnum sænska sem bragðaðist eins og saffranhunangsvanillu pappi)

það eina sem ég geri fyrir þessi jól er að:

1. kaupa fáeinar ófrumlegar jólagjafir

2. pakka þeim inn í afgangspappír frá því í fyrra

3. kaupa í jólamatinn sem er gos, kjöt, dósamatur og forsoðnar kartöflur

4. liggja í leti!

gleðilega aðventu

takk mamma

fyrir að kommenta

það er mjög notalegt að eiga sér stuðningsmömmu

endilega

kíkið á þessa mynd

og segið mér síðan

hvað í andskotanum þetta er sem konan klæðist.

fréttakokkurinn

nú verð ég að leggja mitt til málanna í þessu stóra Jóhönnu Vigdísar hneyksli. Það verður eitthvað skynsamlegt að komast að.

mér persónulega stendur svo sem fyllilega á sama hvort konan brýtur spagettí áður en hún sýður það og hvort hún síðan étur það eða makar því í hárið á sér. þar sem mér er ekki lagalega skylt að fara eftir uppskriftunum hennar þá finnst mér hún bara mega gera það við matinn sinn sem hana langar til. eins lengi og hún eltir mig ekki uppi með hann. svo get ég víst ekki haft neinar skoðanir á matseldinni þar sem ég hef ekki séð einn einasta af þessum alræmdu þáttum.


en


mér stendur hins vegar ekki á sama um það að matreiðslubækurnar hennar heiti "Í matinn er þetta helst" og "Seinni réttir". reyndar vantar matreiðslubókina "Kvöldréttir" til að fullkomna þennan algerlega og með öllu óverjandi hálfvitaskap.


ég orga inni í mér í hvert sinn sem ég les þessa hallærislegu titla.

loksins þokast þetta mikilvæga mál áfram!

þótt nærfataframleiðendur séu ekki komnir jafn langt og ég í þessum pælingum þá virðist þetta eitthvað vera að mjakast í rétta átt.

á vefsíðu netmoggans í morgun var sagt frá nýrri nærbuxnategund, hinum svo kallaða c-streng, sem er bandalaus og sést þar af leiðandi ekki gegnum fáránlega þröngu fötin þín.

loksins!!

reyndar hef ég ekki mikla trú á c-strengnum; ég sé fyrir mér að konur eigi eftir að kvarta undan nuddsárum og því að fjöðrin stingist of fast í rófubeinið.

en þetta sýnir að það fer óðum að styttast í hugsjón mína um rasstappanærfatnað, eða svokallaðar stringless buttplugknickers. slíkar nærbuxur hafa það umfram c-strenginn að þú færð engin sár eða eymsli eftir of stífan vír því á enda vírsins er mjúkur, sleipur og notalegur rasstappi úr fínasta sílikoni sem smýgur varlega inn í afturendann á þér.

fullkomið!

bandalausar brækur sem haggast ekki nema þú prumpir of kröftulega. og hver gengur eiginlega í svona nærfötum og prumpar síðan?

ekki ég.

oooojjjj

ég á níu mánaða gamalt barn sem elskar kattamat, bæði þurr- og blautmat.

kötturinn þarf núna að borða uppi á eldhúsbekk til að fá að eiga matinn sinn í friði.

hann er ekki sáttur.

?

skil ekkert í því að hafa ekki fengið grísaflensuna enn. hef ekki gripið til einnar einustu varúðarráðstöfunnar eins og að vera duglegri að þvo mér um hendurnar, sótthreinsa börnin mín, hætta að snerta þau og neita að fara í sleik við manninn minn.

svo heilsa ég fólki enn með kossi á kinn, sting upp í mig fingrum eftir að hafa káfað á hurðarhúnum og klinki og bora í nefið með óhreinum puttum.

ef einhver ætti að vera með þessa bjánalegu flensu þá er það ég.

hef örugglega verið bólusett fyrir henni í æsku minni í svíþjóð. þar fengum við allskonar sprautur sem foreldrar okkar nenntu ekkert að spá í. hvort þær væru gegn bólusótt,brókarsótt eða leti.

en ef flensan kemur þá ætla ég að þamba nýja töframeðalið sem ég var að uppgötva, gatorade. það er víst besta meðalið við alls kyns veikindum á borð við flensur og þynnkur.

mæður eru sjúkar (langlangflestar)

lá í morgun og kúrði með litlum heitum böggli með stútfulla morgunbleiu og hugsaði um hvað mér finnst lyktin af volgu hlandi notaleg.

kósí.

starfsheiti endurskoðað

Herra Ólafur Ragnar Grímsson, vindhani Íslands.

kjörlæsi

Ég er illa haldin af kjörlæsi þegar kemur að fyrirsögnum, sérstaklega í dagblöðum. Yfirleitt er það þannig að ég skima í gegnum blaðið og rek augun í áhugaverðar fyrirsagnir, sem reynast svo þegar betur er að gáð bara vera hugarfóstur mín.

Í morgun var ég að fletta þessum subbusnepli Fréttablaðinu og svegldist á seríósinu þegar ég las þessa fyrirsögn á lesendabréfi:

"Hvað kemur skólastjórnendum til?"

Einmitt, hugsaði ég með sjálfri mér, loksins áhugaverð félagsfræðirannsókn þar sem niðurstöðurnar skipta raunverulegu máli og sem fólk getur haft gagn og gaman af.

Hver vill ekki vita hvað það er sem kemur skólastjórnendum til? Ég veit að ég vil það.

Og svo hugsaði ég með mér að það væri gaman ef niðurstöðurnar kæmu á óvart, t.d. ef skólastjórnendur væru ekki upp til hópa með masókískar hneigingar eins og fólk í valdastöðum er víst oft heldur væru þeir margir hverjir haldnir blæti á skóm, asísku fólki á miðjum aldri og óléttum konum (sem ég tel reyndar að sé mjög, mjög algengt blæti).

Áhugavert, hugsaði ég með sjálfri mér, og settist niður spennt að lesa meira um þessa tímamóta rannsókn. Auðvitað flaug gegnum huga minn sú ónotalega hugsun að kannski hefði komið í ljós að óvenju hátt hlutfall skólastjórnenda væri haldinn barnahneigð og það hefði þá ekki komið á óvart að rannsóknin rataði í fréttirnar því barnaperrar vaða uppi í fjölmiðlum eins og þeir séu þrír fjórðu þjóðarinnar. Ég vonaði vitaskuld að annað hefði komið á daginn.

Vá, hvað ég varð fyrir miklum vonbrigðum þegar ég var sest á rassinn útaf þessu og las fyrirsögnina aftur yfir:

"Hvað gengur skólastjórnendum til?"

Ég meina hverjum er ekki skítsama. Þetta fólk er þarna bara til að hirða launatékkann sinn eins og allir aðrir og reynir að skrönglast í gegnum þetta vanþakkláta andskotans djobb bara til að hafa ofaní sig og á og kannski komast í nokkrar utanlandsferðir.

Díses. Og um þetta fær fólk að þvaðra endalaust í einhverjum aðsendum greinum, sjálfu sér og öðrum til ómældra leiðinda.

Þetta er ekki áhugaverð spurning, hin, hvað það eiginlega er sem kemur þessu fólki til þar sem það er búið að læsa sig inni á skrifstofu til að forðast leiðinlega undirmenn sína og skjólstæðinga er mun meira spennandi og þess verð að einhver hugsjónamaðurinn eða konan fabúleri um hana í aðsendri grein í blaðinu á næstu dögum.

Í guðanna bænum, áður en við deyjum öll úr leiðindum á þessu kreppuskeri.

enn eina ferðina er mér gróflega misboðið

síðan hvenær má ekki sýna kvenfólki fyrirlitningu rétt eins og öðru fólki?

djöfull missti ég af því minnisblaði en ætla að leita það uppi til að geta étið það.

nú eru einhverjir blaðamenn í hádegismóum og feministar í kastljósi búnir að eyðileggja fyrir mér eina aðalskemmtun mína sem heimavinnandi húsmóðir í fæðingarorlofi; að skoða appelsínuhúð fræga fólksins, lesa um lafandi silikonjúllur, fræðast um galla bótoxmeðferðar og læra allt um framhjáhöld uppdópaðra hollívúddstjarna.

óféti!

þegar ég er búin að ausa úr skálum reiði minnar hér ætla ég að hafa uppi á feisbúkk síðunni sem búið er að stofna til stuðnings hinnar afar smekklegu og ritfæru ellý ármanns og gerast þar meðlimur eða aðdáandi eða bara eitthvað í andskotanum til að lýsa yfir geigvænlegri vanþóknun minni á þessum tilburðum menntafólks til að kæfa tjáningarfrelsi fávita og upplýsingaþörf sjúklega hnýsinna bjána.

niður með háskólann, morgunblaðið og feministafélag íslands!

lengi lifi ellý ármanns og slúðursíðan vísir.is (og forsetinn)!

djók?

lifrarsamlagið?

marmarakúkur

svona eins og marmarakökur.

ég á svo hæfileikaríkar dætur.

cosmopolitan fyrir 9 ára stelpur - loksins!

ég er mjög hrifin af þessu nýja barna- og unglingatímariti, Júlíu. þar getur dóttir mín sem er orðin níu ára loksins fengið almennileg förðunarráð. hún lítur stundum út eins og ég veit ekki hvað og ég reyni oft að segja eitthvað en þið vitið hvernig þessir gemlingar eru; hlusta ekkert á foreldra sína og rífa bara kjaft.

mikið var að hún lærði að maskara sig greyið. ég hef ekki tekið hana með í fjölskylduboð að undaförnu vegna þess að mér hefur þótt hún líta svo asnalega út en þetta er allt að breytast með tilkomu Júlíu. núna, þegar hún er búin að fræðast um hvaða gallabuxnasnið hentar hennar líkamsvexti þá er ekki eins pínlegt að sjást með henni á almannafæri. og eftir að hún lærði að hræra í heimaspa og hirða á sér húðina þá líður mér miklu betur þegar við förum eitthvert saman.

hér áður fyrr var fólk nú bara í vafa um hvor okkar væri mamman. ég hef nú alltaf kunnað að hirða mig, farða og velja gallabuxur sem henta mínum líkamsvexti fullkomlega en við fæðumst víst ekki allar jafn hæfileikaríkar. Júlía sinnir bráðnauðslynlegu fræðsluhlutverki fyrir stelpur á aldrinu 9-15 og fagna ég heilshugar þessari mikilvægu viðbót við íslenska kvennamenningu og mæli með tímaritinu við alla foreldra sem eiga stelpur á aldrinum 9-15 sem líta út eins og litlar myglaðar herfur í asnalegum gallabuxum.

guði sé lof að einhver hugrökk manneskja í útgáfubransanum tók loks af skarið og þorði að gera eitthvað í þessu pínlega máli.

börn eru krúttleg og allt það, en...

getur einhver minnt mig á af hverju maður er að þessu? eftir 8 mánaða svefnleysi þá á ég erfitt með að muna af hverju ég ákvað að eignast annað barn. eins og eitt sé ekki meira en nóg. þau gera ekki beinlínis mikið gagn, sum eru að vísu krúttleg, en alls ekki öll og þú getur aldrei verið viss um það fyrirfram, og þess á milli eru þau bara með bölvað vesen.

ég á níu ára barn sem píndi mig til að lesa fyrir sig sögu og klóra sér á bakinu í háltíma í gærkvöldi og annað tæplega átta mánaða sem heimtaði að vera svæft fimm sinnum áður en ég get snúið mér að því eldra. svo vakti það mig organdi sjö sinnum til viðbótar yfir nóttina. mig langaði til að bjóða því snafs þegar það fúlsaði við brjóstinu.

já, ég er að fara með það í viðgerð seinna í dag. helst langar mig til að skilja það eftir á læknavaktinni þangað til þeir eru búnir að laga það, alveg eins og við fáum að gera við bílinn hjá sigga bifvélavirkja. er tilbúin að greiða jafn hátt verð fyrir það og við gerum fyrir þjónustuna á bifreiðaverkstæðinu. en ef það er ekki í boði sendi ég manninn með þetta þetta skrapatól til sigga. hann hlýtur að redda þessu fyrir fimmtíu þús. höfum getað treyst á hann hingað til.

af hverju er ekki til eitthvað sem heitir "foreldraverndarnefnd"? þá gæti ég kært börnin mín fyrir illa meðferð og fengið bæði samúð og himinháar skaðabætur.

litlu óféti

nýja lífsmottóið mitt

er eftirfarandi staðreynd:

fegurð er hamingja

þessa visku hef ég frá nivea, snyrtivöruframleiðanda.

ég veit ekki almennilega hvað þetta merkir en þetta er bara svo órætt og viskulegt.

fegurð er hamingja

fegurð ER hamingja

fegurð er HAMINGJA

FEGURÐ er hamingja

löv it ætla að lifa eftir þessu héðan af. þarf líklega að kaupa mikið af nivea gumsi til að það takist.

af sjávárháska og afturgöngum

þetta er soldið pínlegt en hann óskar magnússon, útgefandi, virðist ekki hafa fengið minnisblaðið mitt um "að eftirleiðis er óheimilt að grípa til sjávarháskalíkinga þegar lýsa á því hvernig fyrirtæki mitt/ríkisstjórn mín/group samsteypan mín/ fáránlega dýra bílalánið mitt ætlar að komast í gegnum kreppuna án þess að setja mig og annað fólk á hausinn".

simmi í kastljósinu hefur greinilega ekki heldur fengið minnisblaðið mitt um "að sjávarháskalíkingar eru ekki svör og þýða ekki beinlínis neitt þegar ekki er um að ræða skip/seglskútur/brimgarða/öldurót og svo endalaust framvegis".

og svo fylgir maðurinn svörunum ekki eftir. þegar óskar magnússon byrjaðir að rausa um brimgarða og byr í seglinn, eins og einhver snarvitlaus uppfinningamaður að segja frá nýjasta verkefninu sínum sem gjörbylta muni heiminum, af hverju hundskaðist sigmar þá ekki til að fá skýrari svör?

tökum til dæmis það sem óskar magnússon sagði á fundi með starfsmönnum árvakurs: "við munum freista þess að fá byr í seglin, binda allt lauslegt og sigla í gegnum brimgarðinn. í þessa siglingu eru valdir tveir menn, afar hæfir, hvor á sinn hátt."

svona hélt hann áfram að rausa allan daginn og fram á kvöld í kastljósinu þangað til það gutlaði sjór í eyrunum á fólki. sigmar hefði getað spurt það sem alla þyrsti að vita: hvort senda ætti þá 11 starfsmenn sem enn væru eftir hjá árvakri á siglinganámskeið í nauthólsvík og hvort hann væri búinn að taka á leigu seglskútu eða nokkrar trillur (þá er hægt að tala um flota sem er líka skemmtileg líking)? hann hefði líka mátt forvitnast um það hvort davíð hefði notað tímann eftir að hann losnaði úr seðlabankavirkinu til að fræðast meira um sjávarháskann (sem steðjar að okkur) og kannski tekið kúrsa í stýrimannaskólanum? og hvað með harald johannesen er hann með skipstjórnarréttindi? pungapróf? þetta eru spurningar sem þarf að svara og óskar magnússon má bara ekki sleppa svona billega.

annað skylt efni er hann elsku davíð okkar oddsson. ég er með kenningu. tja, eða kannski svona tilgátu. ok, ok, ég er með spádóm. hann hljóðar svona: þegar (EF) davíð oddson deyr þá mun hann ekki liggja kyrr og þægur í gröf sinni eins og önnur liðin lík. þvertámóti. hann mun halda áfram að ásækja íslensk stjórnmál og íslenska þjóðfélagsumræðu langt fram yfir opinberan dánardag sinn. hann mun einnig ganga aftur í seðlabankakastalanum (bara af því hann er svo drungalegur og töff).

þetta er ekki líkingarmál. ég leggst ekki svo lágt. ég meina að hann muni beinlínis halda áfram að skipta sér af því sem kemur honum ekki lengur við. líklega verður hann með fastan lið í morgunblaðinu "leiðari að handan" og svo verða lögð fram á alþingi sérstök "frumvörp úr gröfinni" og seðlabankanum verður stýrt út á haf (liggur beint við) upp í næsta öldurót við næsta brimgarð af draugaskipstjóranum alræmda.

við verðum aldrei frjáls!

jæja, ljúkum þessu nú með sjávarháskalíkingu til heiðurs óskari magnússyni (munurinn á líkingum hans og þessari er að þessi á beinlínis við því við erum stödd á eyju):

þegar skútan er að sökkva er ekkert annað eftir að gera en að stökkva frá borði.


(mér þykir leitt ef einhver drekkti sér eftir að hafa lesið þennan pistil en það ætti þá að kenna þeim hinum sama eitt sinn fyrir öll að taka ekki mark á vitlausum pistlahöfundum).


túdílú

omg

mér datt aldrei í hug að það yrði svona mikið úr þessum kartöflugreyjum sem ég setti niður.

núna vantar mig kartöflukjallara fyrir þær þessi tvö tonn af úrvals rauð- og gullaugum.

kartöflur til sölu

fyrir duglegt fólk sem nennir að moka þær upp

svona 130.- kílóið?

leggir og mislukkuð sambönd

frétt af vísi.is:

"Leggir leikkonunnar Jennifer Aniston, 40 ára, voru myndaðir í New York í gærdag, þar sem hún er við tökur á kvikmyndinni „The Bounty".

Jennifer, sem sagði í nýlegu viðtali að henni þætti ekki erfitt að vera ein, var klædd í stuttbuxur eins og sést á myndunum.

Jennifer hefur átt þó nokkur mislukkuð sambönd eftir að hjónaband hennar og leikarans Brads Pitt endaði með skilnaði."

bara svona til að vega upp á móti æsleiv-þvælunni

sigmundur ernir alþingismaður

ok, sigmundur ernir drakk sig pöddufullan í boði banka og reyndi síðan að ljúga sig frá því.

held ég sé búin að ná því.

það sem ég skil ekki er af hverju fólk er að kvarta. þetta er tíu sinnum skemmtilegri frétt en icesave hroðbjóðurinn sem ég les ekki um daglega. fólk verður að læra að meta það sem það góða sem því býðst í stað þess að kvarta bara endalaust.

ég fyrirgef sigmundi um leið og ég þakka honum kærlega fyrir skemmtunina og vona að ég þurfi að fyrirgefa honum aftur bráðlega.

silvio berlusconi er ekki íslenskur en sigmundur ernir, árni johnsen, davíð oddson, þráinn bertelsson og ólafur ragnar grímsson eru það. og fyrir það megum við þakka mæðrum þeirra og guði.

takk.

katherine heigl+sandra bullock

björguðu tótallí vikunni minni. mæli með "the proposal" og "27 dresses". samt ekki horfa á svona með kærastanum, sérstaklega ekki ef hann er sjúklega stríðinn.

ég sé svo innilega eftir að...

...hafa ekki kosið borgarahreyfinguna.

þingmenn borgarahreyfingarinnar eru jafn náttúrulega þeir sjálfir án þess að skammast sín vitundarögn og uppáhaldið mitt hann Silvíó Berlúskóní.

hef ekkert meira um þetta að segja, er bara snortin og orðlaus af aðdáun.

I löv borgarahreyfingin

fótboltanámskeið fullorðinna

nú langar mig til að láta tvo æskudrauma mína rætast á þessu ári:

1. mig langar til að læra að spila fótbolta og vera í fótboltaliði (ekkert siríös, bara svona vinahópsliði)

2. mig langar í playmó sjóræningjaskipið í jólagjöf (sem ég hef þráð heitt síðan ég var ca. 8 og sá það fyrst)

en hvar kemst maður á fótboltanámskeið fyrir fullorðna (eins og sundnámskeiðið sem ég fór á fyrir 4 árum og var yngst á...) og hver vill koma í playmó?

pistill um hvað við getum lært af kreppunni

fannst bara vanta svona pistil um hvað það er sem við getum lært af kreppunni. það er nefnilega svo ótal margt.

t.d. getum við lært að í kreppu gufar það litla skopskyn sem pistla-, bakþanka- og leiðarahöfundar bjuggu áður yfir algerlega upp og frá og með fyrsta degi kreppu skrifa þeir bara viðurstyggilega leiðinlega pistla um það sem aðrir eiga að læra af kreppunni.

það sem ég hef aðallega lært í kreppunni er að hætta að lesa pistla eftir fólk sem missir vitið í kreppum.

til hafdísar

sko, nú vilja ungir hústökumenn meina að þeir hafi gert hústöku en fengið svo leyfi húseigenda fyrir hústöku. þannig að þeir hafi þá í raun gert húslán. en hvað gerir maður: kennir maður ungum hústökumönnum íslensku eða gerir maður íslenskukennslu og er það þá á þeim eða fyrir þá?

kannski að maður framkvæmi kennsluna á þeim?

allavega, nú geri ég ekki meiri prófarkalestur í dag. enda ekki sérfræðingurinn.

víkin og vitið

við mæðgur skruppum í nauthólsvíkina hérna um daginn til að ata okkur út í sandi, borða nesti og verða pínu kalt.

sem ég lá þar og tróð í mig kanilsnúðum og ís og glápti á allt hálfbera kvenfólkið sem vara annað hvort íturvaxið eða tótallí megafitt, fátt þar á milli, þá hleraði ég samtal tveggja vinkvenna.

önnur var föl og íturvaxin en hin flóridabrúnn aerobikk-fíkill með silikon júllur.

þær voru að spjalla um börn og muninn á strákum og stelpum. eldri börnin þeirra voru stelpur en svo höfðu þær báðar eignast stráka og þær voru sammála um að strákarnir væru fyrirferðameiri og að munurinn hefði komið þeim báðum á óvart. þær væru nú alltaf á hlaupum eftir þessum strákgríslingum en að stelpurnar hefðu allar verið mun rólegri. (önnur hugsanleg skýring er sú að þær eru orðnar eldri og latari, ég ákvað hins vegar að skipta mér ekki af samræðunum þar sem þær virtust vera búnar að gera upp hugi sína með þetta)

svo klykkti líkamsræktar blökkukonan út með því að maður yrði nú að líta á björtu hliðina á þessu öllu saman. það væri jú frábær brennsla fyrir þær að eiga svona kraftmikla stráka, þ.e.a.s. svona megrunarbörn.

hér er komið frábært viðmið fyrir þær okkar sem eru alltaf að berjast við þessi auka 2 (eða 5 eða 15 eða 50) kíló en vilja samt ekki missa sig alveg og enda útbíaðar í smjörlíki uppá sviðið í einhverri fitness-keppni.

viðmiðið er eftirfarandi: þegar ég er farin að líta á barnið mitt sem hjálpartæki í megrun minni og líkamsfegrun þá er þetta farið úr böndum og tímabært að troða í sig nokkrum berlínarbollum, bragðaref, grillkótilettum með mæjónesbaseraðri grillsósu og slaka síðan á uppí sófa.

það var kannski þarna sem hún áttaði sig á því að í staðinn fyrir að eignast þrjú börn þá hefði hún allt eins getað fengið sér labradorhvolp.