Ótrúlega merkilega bloggið

Velvakandi

2012-02-04T15:47:00.000Z

Ég veit það

Mín reynsla er sú að þá veit ég það betur og oft kemst ég að því að ég vissi það bara pínulítið eða kannski bara ekki neitt og stundum var þetta bara tóm vitleysa sem ég hélt að ég vissi. Það er mjög „inn“ að vera að vinna í því að vera í núinu í dag. Hvernig er það í framkvæmd? Svo er líka hægt að skoða hvernig er ég í þáinu? Virk hlustun, hvað er það? Hefur þú fengið svoleiðis? Er ég í núinu þegar ég veiti virka hlustun? Er ég í þáinu þegar ég nenni ekki að hlusta og segi bara: ég veit það? Hvað er ég að gera þegar ég dæmi? Mín reynsla er sú að þá loka ég. Dómur og baktal eru auglýsing á minnimáttarkennd fyrir mitt leyti, hef svo sannarlega verið þar. Samskipti mín við mig, hvað er það? Endurspeglar það sem mér finnst um aðra það sem mér finnst um mig? Fyrir mitt leyti er ég sammála drengnum sem sagði að „úr fylgsnum hjartans mælir munnurinn“. Ég segi við mig í dag: Eyddu tíma í kyrrðina, tek hana með mér út lífið. Svo að lokum sagði góður maður við mig og að mínu viti vitur: Ég á ekki að gefa ráð; þeir fávísu fara ekki eftir þeim og þeir vitru hafa ekkert við þau að gera.

Besta gjöf í heimi

2012-02-03T12:33:00.000Z

Það er búið að koma fyrir svona áskriftarkassa hér á hægri spássíu þar sem þeir sem vilja geta sett inn netfang sitt og orðið áskrifendur að þessu bloggi.

Nú, það er kannski ekki vitlaust að benda á að þetta er líka frábær gjöf handa þeim sem maður þykir vænt um og vill gleðja. Áskrift að bloggi.

Ég hef skoðanir á öllu í heiminum.

2012-02-03T12:27:00.002Z

Ég er alveg örmagna eftir að hafa myndað mér skoðun á alls kyns málum sem ég hef ekkert vit á og sett þær í status á facebook, lent í rökræðum og fengið óskiljanlega mörg læk.

Sérstaklega tóku símaskrármálið, Landsdómsmálið og stóra stelpu- og strákaísmálið á og svo tókst mér að hafa skoðun á hörmulega sjóslysinu, hvernig sem það var nú hægt (það er nú eiginlega bara fyrir þá allra hörðustu).

Spurðu mig að hverju sem er, ég hef skoðun á því!

Skott

2012-02-02T14:09:00.000Z

Elísabet Friðrika veit hvað skott er. Hundar eru með skott. Hún heldur því líka fram að pabbi hennar sé með skott.Við höfum ekkert verið að leiðrétta hana.

Og eins og maður gerir við hunda þá hefur hún togað í skottið á honum. Þess vegna fær hún ekki að fara með í karlaklefann í sundi.

Þegar við mætum hundum og eigendum þeirra úti á götu hefur hún líka æpt hátt og snjallt:

Hann er með skott! Alveg eins og pabbi minn!

Límmiðabókin mín

2012-02-02T11:55:00.002Z

Ég þurftir að keyra eftir svona límmiðum til að líma á gömlu símaskránna. Reyndar hafði ég aldrei fengið mér símaskrá þannig að ég notaði tækifærið og greip eina í leiðinni. Hún er afskaplega þung.

Þegar ég kom heim með hana átti ég erfitt með að velja límmiða til að setja yfir meinta nauðgarann þannig að ég mátaði þá báða tvo og velti þessu vandlega fyrir mér. Þið getið rétt iðmyndað ykkur hvað ég var vonsvikin þegar ég áttaði mig á því að límmiðarnir duga ekki til. Þeir eru allt of litlir því að lappirnar á Agli standa út undan þeim (nú, eða hausinn ef maður vill ná yfir lappirnar).

Mér fannst það ekki smekkleg lausn að nota báða miðana. Þá hefði líka þurft að klippa af þeim og ég veit ekki hvað.

Fyrst þetta var svona ákvað ég bara að líma nýju límmiðana mína inn í límmiðabókina (yfir síður með Sigurðum og Guðmundum vegna þess að þeir eru hlutfallslega of margir) og teikna gleraugu, trefil og götóttan bóhemahatt á Egil.

Áskorun til forseta

2012-01-25T11:22:00.000Z

Þegar ég gúgglaði "'Ólafur Ragnar Grímsson handlegssbrotinn" þá kom þessi mynd upp:

Hún lýsir vel tilfinningum mínum ef Ólafur situr áfram enn eitt óendanlega langa kjörtímabilið. Ég og þessi uppgefni ísbjörn verðum þá eins konar sálufélagar.

Vestfjarðabrauð

2012-01-25T10:12:00.001Z

Þessi uppskrift er eftir matgæðing vikunnar, Elísabetu Friðriku, sem er orðin yfir 90 sentimetrar á hæð og ber sig eftir því. Uppskriftin er einföld en ljúffeng og hráefnið má finna í öllum betri vegasjoppum Vestfjarða. Bláberin voru sótt upp í hlíðina við setrið á Ögri.

Uppskrift - fyrir 1
1 sneið samlokubrauð (má nota annað brauð)
1 matskeið jarðaberjasulta (þjóðrembur mega nota rabbarbarasultu)
1 sneið hangiálegg
2 sneiðar reyktur lax
Önnur sneið hangiálegg
2 bláber
1 dropi af sultu til skreytingar

Hráefnið er sett á í þeirri röð sem það er talið upp.

Njótið!

Mamman sem át og át

2011-12-27T12:03:00.001Z

Vaka stórasystir (11) var að segja Elísbetu Friðriku (2) frá Ítalíuferð fjölskyldunnar og þá hlaut að koma að mikilvægustu spurningunni: "En hvar var ég?".

Vaka svaraði: "Þá varst þú enn þá pínulítil og þú varst í maganum á mömmu."

Og E.F.E. spyr um hæl, dálítið hissa "Ó, var mamma búin að borða mig?"

Það er svo jólalegt að sleikja hluti

2011-12-16T19:00:00.002Z

Ég var einmitt að enda við að sleikja miðstærðarpottinn minn í tilefni dagsins, enda kom Pottasleikir/Pottaskefill til byggða í nótt og tróð upp á jólaballinu sem mér var boðið á.

Hann sýndi töfrabrögð og var með smá stand-öpp, greinilega skíthræddur um að vera of gamaldags fyrir 2-5 ára gömul nútímabörn.

Krakkarnir botnuðu ekkert í þessu. En ég kann samt að meta Pottaskefil og sleikti pottinn þegar ég var að búa til jólakonfektið núna áðan. Til að heiðra arfleið hans.

Ég sleikti líka þvöruna, þótt það væri degi of seint. Þar fyrir utan hef ég ekki gert margt til að heiðra jólasveinana okkar þetta árið annað en að vera lágvaxin daginn sem Stúfur kom til byggða.

Hurðaskellir er uppáhaldsjólasveinninn minn og ekki á morgun heldur hinn ætla ég að skella öllum hurðum sem ég get.

Afmælisbarn dagsins

2011-12-14T15:24:00.000Z

Er dverghamsturinn okkar hann Stúart litli. Hann er eins árs. Til hamingju með daginn, elsku Stúart okkar!

Börn eru líka fólk!

2011-12-07T08:58:00.001Z

Þessi mynd kom upp þegar ég gúglaði "People who don't like sex". Aðrar myndir sem komu upp voru af Isabellu Rosselini, litlum kafloðnum hundi og jarðaberjatertu.

Þetta er athyglisverð bók fyrir þá foreldra sem sjá sig knúna til að ræða kynlíf við 9 til 12 ára gömlu börnin sín.

Let's talk about s-e-x ... A read-and-discuss guide for people 9 to 12 and their parents

Eða bara let's not.

Takið eftir að í titlinum er ekki talað um börn heldur fólk. Börn eru líka fólk.

Bjúga

2011-12-02T10:48:00.001Z

Elísabet Friðrika er búin að læra nöfn fimm jólasveina. Þeir heita: Kertastaur, Skellihurð, Hurðasleikir, Bjúga og Jólasveinn.

Fjórði vítisengillinn

2011-11-28T20:02:00.001Z

Hér má sjá bróður minn, fjórða vítisengilinn, ganga inn í Héraðsdóm í dag.

Já, maður spyr sig hvað hann sé að gera þarna með höndina upp við höku. Er hann að borða banana? Snýta sér með handarbakinu?Ég sá svo kvöldfréttirnar og komst að því að það var hið síðara. Hann snýtti sér í sjöfréttunum.Mamma og pabbi eru afar stolt af honum.

Aðventuilmurinn

2011-11-28T13:30:00.001Z

Ég fann hvergi nærfataskúffuna mína í morgun. Hún var ekki á sínum venjubundna stað og ég stóð bara fyrir framan fataskápinn og klóraði mér í hausnum þangað til það rifjaðist upp fyrir mér að Elísabet Friðirka (2) hafði sýnt henni mikinn áhuga að undanförnu. Klætt sig í brjóstahaldara og þvíumlíkt.

Og viti menn. Nærbuxnaskúffan mín var orðin hluti af leyndum fjársjóð sem ég gróf upp í skúmaskoti þar sem ég hafði séð hana pukrast eitthvað kvöldinu áður.Í henni var hálfur Ljúflingur, uppáhaldsostur nærfataþjófsins. Hann hafði fengið að gerjast ofan í nærbrókunum mínum í alla nótt.

Nokkru síðar ætlaði ég að fá mér mandarínu. Mandarínurnar 20 sem ég hafði sett í skál í gærkvöldi voru hvergi sjáanlegar. Ekki fyrr en ég gáði í fjársjóðsskotið. Ég endurheimti þær og fékk mér mandarínu og hugsaði í smástund um fólk sem stelur hvítmygluostum og felur þá í nærfötum foreldra sinna.

Mandarínu-, nærbuxna- og ostaþjófurinn alræmdi verður fyrir gífurlegum vonbrigðum þegar hann kemur heim á eftir og finnur hvergi nýju nærfata/ostageymsluna sína og mandarínurnar sem hann hafði stungið undan og var að hamstra fyrir veturinn.

G-strengurinn og sjálfsblekkingin

2011-10-26T14:25:00.000Z

Jæja. Nú hef ég barist gegn G-strengnum í á annan áratug. Hér er enn eitt dæmið máli mínu til stuðnings. G-strengir eru aldrei kynó. Aldrei.

Ef þú vilt sýna sem mest af rasskinnunum þá áttu bara ekkert að vera í nærbuxum yfirhöfuð. Eða buxum ef því er að skipta.

Ef maður gúglar G-streng þá koma upp 50 myndir af rasskinnum og svo 1 af kínverskum manni með gítar. Hann er ansi einmannalegur að sjá innan um alla þessa beru rassa.

Um jafnrétti í sundlaugum

2011-07-14T12:29:00.005Z

Ég fór með Elisabetu Friðriku (2) í sund hérna um daginn og dró hana á klósettið áður en við fórum ofan í. Hún var eitthvað treg til að fara á klósettið í þetta skiptið og sagði orðrétt: "Nei, I pissa í sundið."

Mig hefur að vísu grunað þetta í þó nokkurn tíma en það er samt ekki huggulegt að fá grunsemdir sínar staðfestar með þessum hætti fyrir framan fimmtán aðra sundlaugargesti.

Hér að ofan er mynd af dæmigerðum glottandi sundpissara.

Í raun væri bara réttast að allir fengju að pissa í laugina, enda ekki sanngjarnt að bara sumir fá að gera það sem öllum finnst gott, að láta líða úr sér í heita pottinum.

Mary and Max

2011-06-15T12:31:00.003Z

Við mæðgur fórum í Bíó Paradís að sjá hina dásamlegu Mary and Max. Og núna langar mig líka í andlega fatlaðan pennavin í New York.

Af hverju gerist þetta ekki oftar?

2011-06-08T11:47:00.005Z

Hérna er frétt um svan sem var svo ótillitsamur að lenda ofan á ungri stúlku í skólaferðalagi þegar hann féll til jarðar eftir að hafa drepist á flugi.

Það er ekki minnst á það einu orði hvernig litlu stelpunni heilsast eða hvort hún hafi rotast við þetta.

Þegar ég gúgglaði "swan dead" komst ég að því að það eru til ógrynnin öll af ljósmyndum af dauðum svönum. Stökum og í hópum.

Elísabet Friðrika

2011-05-24T09:25:00.006Z

Tveggja ára unglingurinn var rifinn á fætur í morgun, ýlfrandi. Hún neitaði fyrst að vakna, sagðist ætla að "lúlla meira" og vildi fá pela með mjólk upp í rúm. Ég píndi hana fram í morgunmat þar sem hún var með tiktúrur og stæla og þegar ég leit eitt augnablik af henni laumaðist hún fram í stofu. Þar fann ég hana uppi í sófa með sæng og fékk að heyra að litla hún: "Eggi fara á leiggólann. I lasinn. I horfa á vídó. I fá pela".

Til að gera langa og mæðusama sögu stutta þá fékk litla og ótrúlega hortuga I engan andskotans pela upp í sófa, sængin var rifin af henni, hún klædd í föt og þetta vídéo-gláp er nú bara fjarlægur draumur. Í lokatilraun til að fá að ráða sér sjálf fór hún í háhælaða silfurskó af stórusystur sinni og sagðist eiga þá og ætla að fara í þeim á "leiggólann". Svo orgaði hún auðvitað þegar þeir voru rifnir af henni og gólaði alla leið á leiggólann.

Litla, óþekka I fretaði líka hátt og snjallt við matarborðið hérna um daginn og þegar við Vaka spurðum hana hvað maður ætti að segja þegar maður hefði prumpað horfi hún á mig og laug því upp í opið geðið á mér og fyrir framan nefið á Vöku, að það hefði ekki verið hún heldur Vaka sem hefði prumpað. Þegar mamman útskýrði síðan að maður segði "afsakið" kom loks: "Afskakið, litli bossi," um leið og litla bossa var klappað mjúklega og horft á hann aumkunaraugum.

Möhgæs

2010-12-07T20:43:00.004Z

Elísabet Friðrika segir möhgæs (stundum möhgæð), með áhersluna á ö-ið og eins og hún sé dönsk. Ég er svo hrifin af þessum framburði að ég er alltaf að tala við hana um möhgæsir.

Nakti piparkökubakarinn

2010-12-06T17:57:00.005Z

Við bökuðum piparköku í dag. Þrjár konur, misstórar. Ein okkar kaus að vera nakin við baksturinn og að kúka á gólfið í tilefni dagsins.

Ég vona að þið, kæru vinir, eigið líka margar ánægjustundir með nöktum fjölskyldumeðlimum ykkar þessa aðventu en ég vona að þeir nái að hlaupa á klósettið þegar þeim verður mál.

Sirka svona leit piparkakan okkar út, vona að ykkur gangi jafn vel við baksturinn.

Eigið dásamlega aðventu!

Joseph litli

2010-11-26T13:12:00.005Z

Ætli það sé ekki skrítið að þurfa að skipta um nafn á gamals aldri? Hérna er páfinn þegar hann var lítill og hét Joseph.

Nú anga ég af mandarínum allstaðar

2010-10-03T13:40:00.007Z

Litla Elísabet er ekki bara ráðrík og athafnasöm heldur líka einstaklega hjálpsöm. Og það var vegna þessa sem hún lenti í því að reka puttann upp í rassinn á mömmu sinni.

Hún kom að mér eftir sturtu þar sem ég var maka mig alla í kroppakremi og sagði:

"Mamma krem bossi" um leið og hún rak puttann ofan í kremdolluna og fór aftur fyrir mig með vísifingur á lofti.

Nú, ég gerði ráð fyrir að það yrði potað í rasskinnina á mér og að þar yrði skilin eftir kremslumma sem ég þyrfti svo sjálf að dreifa úr.

Þetta gerðist ekki. Hins vegar fann ég fyrir litlum putta milli rasskinnanna.

Og nú er ótrúlega glöð að vera með bosmamikinn rass og að eiga stuttputtað barn.

Hvað þýðir "dick"?

2010-04-13T21:23:00.003Z

Við gerðum þau mistök að horfa á Legally Blonde I með 9 ára barninu.

Leikskólabörn

2010-04-12T10:03:00.002Z

Hor og sandkassasandur saman er bara andlitsskrúbb.

Alltaf að smakka

2010-04-07T10:36:00.002Z

Hérna um daginn þegar ég kom að sækja litla skrippildið á leikskólann þá fann ég hana bograndi úti í sandkassa, alsæla með skóflu, vörubíl, bleikt nef og horblauta efrivör. Þegar hún sá mig þá ljómaði hún öll og sneri sér strax við til að moka eitthvað í flýti.

Ég náði að hugsa með mér að það væri nú dásamlegt að það skyldi vera farið að vora svo að börnin kæmust út og gætu glaðst svona.

Þegar hún sneri sér aftur að mér þá sá ég hvernig eftirvæntingin skein úr augum hennar en náði ekki að átta mig á því af hverju hún var svona spennt fyrr en hún var búin að æpa "namm, namm" og reka skóflu fulla af sandi upp í mig.

Hvernig þekkir hún hana?

2010-01-20T09:18:00.003Z

Eldri dóttir mín, sem verður 10 á árinu, skráði sig inn á barbiegirls.com í gær undir nafninu asdisran.

Klámvæðing?

2009-11-18T11:12:00.005Z

Hafið þið heyrt fjallað um þessa nýju nærbuxnategund, C-strenginn, sem er bandalaus (löngu tímabært!)?

Nú er bara tímaspursmál hvenær rasstappanærfatnaður (stringless buttblugknickers) kemur á almennan markað.

Kósí

2009-11-05T13:18:00.003Z

Lá í morgun og kúrði með litlum heitum böggli með stútfulla morgunbleiu og hugsaði um hvað mér finnst lyktin af volgu hlandi notaleg.

Starfsheiti endurskoðað

2009-10-30T10:48:00.002Z

Herra Ólafur Ragnar Grímsson, vindhani Íslands.

Júlía - tímarit fyrir stelpur

2009-09-30T14:02:00.005Z

Förðunarráð, heimatilbúnir andlitsmaskar, gallabuxnatips, sætir strákar og nákvæmlega ekkert annað.

Fegurð er hamingja

2009-09-25T10:56:00.003Z

Lífsmottó í boði Nivea.

Hvað getum við lært af kreppunni?

2009-07-29T11:00:00.004Z

Mjög margt.

Elísabet Friðrika

2009-07-13T23:38:00.003Z

Er orðin 6,825 kíló og gengur af því tilefni undir nafninu Hlussubet þessa vikuna.

Grindarbotnslóð

2009-07-13T22:59:00.007Z

Hvenær notar maður svoleiðis?

Velvakandi

2009-04-19T08:10:00.002Z

Glaðleg þjónusta í ísbúðinni í Smáralind

Ég fór í ísbúðina í Smáralind á dögunum og þurfti að ná í stóra ístertu. Ég ætlaði að taka við tertunni en afgreiðslustúlka bauðst til að halda á henni út í bíl fyrir mig. Þegar út í bíl var komið spurði ég hvort tertan yrði farin að slakna eftir klukkutíma því ég var á leið með hana upp í Borgarnes. Afgreiðslustúlkan skokkaði aftur inn og náði í kælikubba sem hún raðar yfir tertuna. Ég veit engin deili á þessari ungu stúlku en kát var hún og svo yndisleg að mér létti í skapi við að sjá hana.

Betri og glaðlegri þjónustu er ekki hægt að fá.

Vaka og mörgæsamorðinginn

2009-03-31T21:20:00.003Z

Vaka sá sýnt úr sænska fréttaskýringaþættinum um norska eldislaxinn sem étur íslenskt fiskimjöl og kom til mín í miklu uppnámi.

Hún hafði nefnilega séð skellihlæjandi illmenni rista lifandi mörgæs á hol og var orðlaus yfir þessum hryllingi.

Langbrók Eiríksdóttir

2009-03-23T23:15:00.002Z

Hún er reyndar stuttfætt þannig að það er eins og háð.

Fullorðinsnöfn eru ekki barnaleg

2009-03-16T17:56:00.003Z

Einu nöfnin sem fara nýfædda barninu okkar eins og stendur:

Kjöthleif Eiríksdóttir
Kókoshneta Eiríksdóttir
Skrippildi Eiríksdóttir
Lifrarpylsukeppur Eiríksdóttir

Feitt fólk vs. þeir sem eru með fitu á heilanum

2009-02-28T20:49:00.003Z

Sumu fólki finnst eðlilegt að byrja að ræða holdafar nýbakaðra mæðra sirka þremur vikum eftir fæðingu.

Barnshafandi

2009-01-21T23:36:00.003Z

Ég er orðin 300 merkur.

Ekki Oslóartréð!

2009-01-21T11:28:00.002Z

Hvernig er hægt að brenna Oslóartré reykvískra barna?

Mannleg samskipti - barnshafandi konur II

2009-01-20T16:51:00.003Z

Ekki segja neitt af þessu við barnshafandi konur:

Vá, hvað þú ert orðinn brjálæðislega ólétt!
Nei, þú ert miklu óléttari í framan en þú varst síðast þegar ég hitti þig!
Sko, þarna kemur feita konan!

Og að lokum: Ekki leika óléttu konuna með því að ganga gleið/ur, halla þér aftur, kjaga og hlæja svona höh, höh, höh hlátri þegar hún sér til og ætlast til þess að henni sé skemmt.

Nja ...

2009-01-05T11:48:00.003Z

Reyndist Reynir Traustason traustsins verður?

Gleðilegt nýtt ár 2010!

2009-01-02T14:09:00.002Z

Stjórnvöld, stofnanir og greiningardeildir hafa keppst um að lýsa því yfir síðastliðna 3 mánuði að árið 2009 eigi eftir að vera eitt versta ár allra tíma og Völvan ákvað svo að staðfesta það í nýársblaði DV og því er líklega best að sleppa því ári og stökkva beint yfir í árið þar sem allt á að fara að hökta af stað aftur: árið 2010.

Við getum svo rétt okkur af með því að hafa t.d. árið 2014 tvisvar sinnum lengra.

Mannleg samskipti - barnshafandi konur

2008-12-01T15:04:00.003Z

Ráð handa öllum sem rekast á óléttar konur.

Dæmi:

Þú: hæ, gaman að sjá þig, þú ert nú aldeilis farin að blómstra. (Er hún pottablóm?)
Ólétta konan: Já, já, þetta stækkar. (Asnaleg athugasemd og svarið eftir því)
Þú: Hvað segiru, hvenær áttu að eiga? (Og þú verður búinn að gleyma því eftir 20 sek.)
Ólétta konan: Eftir tæpa þrjá mánuði. (Hún er alveg komin eð upp í kok af þessu umræðuefni)
Þú: (rekur upp stór augu) Nöhj, (bendir á bumbuna) ertu viss um að þetta séu ekki tvíburar (rekur upp hrossahlátur).
Ólétta konan: (horfir á þig með uppgjafasvip).

Ekki segja fólki að þér finnist það óeðlilega mikið um sig, benda á það og hlæja. Ekki einu sinni þótt það sé barnshafandi.

My baby kicks ass

2008-11-25T12:59:00.002Z

Bókstaflega.

Það kæmi mér ekki á óvart ef ég vaknaði einn góðan veðurdag með litla löpp standandi út úr rassinum.

Hvað tekur eiginlega langan tíma að...

2008-11-19T16:42:00.005Z

...finna nöfn á svona börn?

Spurði Vaka hérna um daginn. Henni finnst við eitthvað löt við þetta og hefur lagt okkur lið við að finna nafn á systkinið sem hún á von á.

Hún er ansi spennt yfir systkininu og er búin að bjóða mér afnot af dúkkuvagninum sínum sem hún notar reyndar sem rúm fyrir köttinn eins og stendur en hefur þá væntanleg hug á að koma honum fyrir annars staðar um leið og ég þarf á vagninum að halda.

Svo hefur hún útbúið dagatal þar sem hún telur niður vikurnar sem eftir eru af meðgöngunni. Reyndar gleymdist það verkefni eftir mikinn áhuga fyrstu vikuna þannig að ég hökti þarna föst í viku 23 eða eitthvað.

Og henni finnst hálfómögulegt hvað við erum róleg við að finna nafn á barnið þannig að hún tók málin í sínar hendur og blaðaði aðeins í nafnabókinni sem við höfðum fengið lánaða og skrifaði niður nokkur nöfn sem henni leist vel á og gætu kannski hreyft eitthvað við okkur. Listinn var á heildina mjög smekklegur.

En ég veit samt ekki hvað hún var að pæla þegar hún skrifaði niður nöfnin Geirfríður, Bogga, Debóra og Garðar. Og það er ekki séns í helvíti að ég nefni barnið mitt Eiríksínu.

Iss, þessi kreppa

2008-11-12T10:06:00.003Z

Ekki hafa áhyggjur af því þótt við fáum ekki hræðilega lánið sem við erum nauðbeygð til að taka frá hræðilegu stofnuninni sem ætlar að kæfa heilbrigðis- og velferðarþjónustuna okkar.

Og

Ekki hafa áhyggjur af því þótt Bretar og Hollendingar ætli að láta okkur borga hlutfallslega hærri skaðabætur en Þjóðverjar þurftu að gera eftir tilraun sína með Þriðja ríkið.

Hafið frekar áhyggjur af því að við búum ofan á logandi kvikuhólfi og að búið er að uppgötva olíuhólf norðaustur af landinu og kjarnorkusprengju á hafsbotni norðvestur af landinu. Mér finnst nú ekki þurfa að hafa fleiri orð um þetta en skal samt útlista þetta betur fyrir þá allra tregustu:

VIÐ MUNUM SPRINGA Í LOFT UPP.

Og deyja.

Vaka og sjónvarpið

2008-11-04T19:02:00.002Z

Biðin eftir barnatímanum er stundum löng:

Æ, af hverju er þessi doktor Pill alltaf í sjónvarpinu?

Drepum auðvaldið?

2008-11-02T11:14:00.002Z

Mótmælagangan í gær laumaðist aftan að okkur eins og flóðbylgja þar sem við vögguðum heim á leið eftir veglega kaffihúsaferð og dró okkur með niðrá Austurvöll. við stoppuðum í korter og heyrðum þrjú verulega slæm tónlistaratriði og síðan varð ég að fara með ógeðslega þunna mannskrippildið mitt heim áður en hann gubbaði.

En það var tvennt sem vakti helst athygli mína:

Annars vegar þá hafði hugaðasti Range Rover eigandi landsins gerst svo djarfur að leggja bílnum sínum í austurstræti fyrir framan Eymundsson. Ég vil koma þeim skilaboðum á framfæri til hans að ef bíllinn hans er illa rispaður hægra megin þá er ég vitni. Ég sá um það bil tvöþúsund manns sem mér þykir líklegir sökudólgar. Fólkið með Drepum auðvaldið skiltið er vitaskuld þar á meðal.

Hins vegar virtust mótmælin ekki snúast um neitt eitt ákveðið, eða einu sinni neitt tvennt, þrennt eða fernt ákveðið. Þarna voru skilti með allskyns ólíkum slagorðum, kröfum og yfirlýsingum. Kosningar strax, Drepum auðvaldið, Burt með Davíð, Niður með þingræði osfrv.

Ernst Jandl

2008-10-28T10:10:00.004Z

Ottos mops

Ottos Mops trotzt
Otto: fort Mops fort
Ottos Mops hopst fort
Otto: soso

Otto holt Koks
Otto holt Obst
Otto horcht
Otto: Mops Mops
Otto hofft

Ottos Mops klopft
Otto: komm Mops komm
Ottos Mops kommt
Ottos Mops kotzt
Otto: ogottogott

Schtzngrmm

schtzngrmm
schtzngrmm
t-t-t-t
t-t-t-t
grrrmmmmm
t-t-t-t
s------c------h
tzngrmm
tzngrmm
tzngrmm
grrrmmmmm
schtzn
schtzn
t-t-t-t
t-t-t-t
schtzngrmm
schtzngrmm
tssssssssssssssssssss
grrt
grrrrrt
grrrrrrrrrt
scht
scht
t-t-t-t-t-t-t-t-t-t
scht
tzngrmm
tzngrmm
t-t-t-t-t-t-t-t-t-t
scht
scht
scht
scht
scht
grrrrrrrrrrrrrrrrrrrrrrrrrrrrr
t-tt

Síðasti mammútinn

2008-10-22T11:31:00.003Z

Ég dró fram ökklasíða pelsinn minn og tróð mér í hann. Næ rétt að hneppa honum yfir bumbuna sem er orðin ískyggilega stór og framstæð.

Ég lít alveg fáránlega út í þessari múnderingu.

Kreppumaturinn

2008-10-07T15:50:00.006Z

Ég fann uppskrifatbók inni í skáp í gær sem ég held að ég eigi ekki eftir að nota mikið á næstunni ef eitthvað er að marka ræðu forsætisráðherra í gær. Við fengum hana gefins frá Mastercard eftir að hafa tekið einhverju gylliboðinu frá því fyrirtæki. Hér eru nokkur dæmi um uppskriftirnar úr bókinni Matreiðslumeistarar og Mastercard:

Ferskjuteskryddaður þorskhnakki með papajakóríandersalati og malt- og appelsínsírópi.
Saffrankræklingasúpa með skelfisksgrænmetisragú
Steiktur hreindýrahryggvöðvi með rótarterrínu og reykeplasósu
Íslenskur humar með Nicoise grænmeti og Apollólakkríssósu
Grillaður túnfiskur með portobellosveppum, hvítum spergli og jarðsveppakálfasoðsgljáa
Bökuð möndlu- og fimmkryddafyllt macintoshepli með skyrsorbet og piparsósu
Villiberja- og kókoskokteill með balsam og vanillufroðu

Hvað eru reykepli? Vil ég í alvörunni bræða apollólakkrís út á humar? Hver notar orð eins og jarðsveppakálfasoðsgljái?

Þessi matreiðslubók er skyndilega orðin að einhverju öðru en uppskriftasafni, hún er heimild um horfna tíma.

Eggið

2008-09-16T13:51:00.005Z

Vaka mín fékk þá hugmynd síðasta vetur að ef hún tæki hænuegg úr ísskápnum og lægi á þig í nokkrar vikur þá myndi klekjast úr því dásamlegur lítill hænuungi sem hún gæti átt og hugsað um.

Hún tók egg og lá á því í svona hálftíma og stakk því síðan inn í náttborðsskápinn sinn og geymdi það þar í nokkrar vikur. Síðan fór ég eitthvað að tala um að það þyrfti nú kannski að henda egginu og þá faldi hún það og tók til vonar og vara af mér heilagt loforð um að ég myndi ekki, alls, alls ekki, undir neinum hugsanlegum kringumstæðum henda egginu. Ég neyddist til að lofa þessu.

En hún treysti mér ekki og faldi það og nú veit ég ekkert hvar þetta egg er niðurkomið.

Que?

2008-09-11T08:56:00.004Z

Nú er karlalandsliðið okkar í fótbolta eitthundraðogsjöunda lélegasta lið í heimi. eða eitthvað álíka.

Allt í lagi með það.

Mér finnst ekkert mikilvægt að íslenskir karmenn séu góðir í fótbolta, þetta er svo sem bara metnaðarmál fyrir þá sem eru að eyða tíma sínum og kröftum í þetta.

Hins vegar langar mig til að vita af hverju í ósköpunum uppáhaldssjónvarpsþættirnir mínir eru felldir af dagskrá svo að ég geti horft á eitthundraðogsjöunda versta fótboltalið heims tapa enn einum leiknum.

Af hverju er það?

Alls ekki kinnroðalaus

2008-09-04T17:13:00.003Z

Ég var í tíma áðan þar sem kennarinn sagði að hann gæti nú alveg haldið einhverju fram kinnroðalaust.

Það sem hann vissi greinilega ekki var að hann var mjög rjóður í kinnum.

Íslensk kjötkveðja

2008-08-16T12:30:00.005Z

Fór á Gay pride um síðustu helgi og komst að því mér til mikillar ánægju að fólk er farið að komast út úr skápnum áður en það þarf að hrökklast inn í hann. Ég taldi nálægt þrjátíu börn á aldrinum 2-14 ára í göngunni sem eru þá öll opinberlega samkynhneigð og ekki annað hægt en að gleðjast yfir þessari framþróun.

Annars var ég þarna að væflast með Vöku (8) minni og datt á einum tímapunkti í hug að fara að útskýra fyrir henni hverju væri nú verið að fagna þarna. eins og henni stæði ekki slétt á sama og hún væri ekki bara að bíða eftir að kría útúr mér sleikjó eða kandífloss og fá að monta sig við vinkonur sínar yfir að hafa staðið 50 sentímetra frá Páli Óskari sem mér reiknast til að sé miskalkúlasjón uppá a.m.k. 9 metra.

Hún spurði mig ekki að því en það hvarflaði að mér að hún gæti haldið að bleiku hárkollurnar væru ætar, rétt eins og kandífloss.

Mamma á Kleppi

2008-04-03T21:59:00.002Z

Mamma var að segja mér að hún ætlar að horfa á First Blood, eða Rambó 1, eins og hún kallar hana. Ein samstarfskona hennar sagði að myndin fjallar eiginlega um áfallastreituröskun. Þær vinna saman á Kleppi.

Hinn langi svefn?

2008-03-20T11:42:00.004Z

Í gær var eg með iðnaðarmann heima sem þurfti að bora tvö göt í veg. Nokkrum mínútum eftir að hann var búin að bora var bankað hjá mér og fyrir utan stóð áhyggjufull kona frá Sálarrannsóknarfélaginu. Hávaðinn hafði sett miðilsfund úr skorðum. þeim atburði lýsti hún með miklu handapati og svipbrigðum, eða eins og hún sagði og lék: "Hún varð bara alveg ..." og svo hristi hún hausinn og hendurnar með munninn galopinn. Hún ætlaði að athuga hvort ekki væri hægt að hætta að bora og ég gat sagt henni að líklega væri búið að bora allt sem þyrfti að bora og því ætti hinn framliðni ekki að þurfa að skelfast meir (og miðilinn ekki að þurfa að fá fleiri lífshættuleg flogaköst).

Það besta við þessa sögu var vitaskuld þegar ég fór aftur inn í eldhús og sagði iðnaðarmanninnum frá því sem fram hafði farið og hann fussaði og í kjölfarið sagði ég:

- Já, ég veit. Andskotans loddarar.
Og þá sagði hann:
- Já, vitleysa. Ég hringi alltaf bara í miðilinn minn.
Og ég varð orðlaus og sagði svo:
- Ertu í alvörunni með miðil?
Og þá sagði hann:
- Já, en alvöru miðil.

Afrekskonur

2008-02-08T17:51:00.001Z

Nú er ég loksins búin að setja heimsmet í rassamælingum áhugamanna með eitt barn undir tíu ára aldri á framfæri. Ég hef rassamælt þetta barn 283 sinnum og við erum báðar orðnar mjög færar. Við eigum von á verðlaunagrip sem er gullhúðaður rass með mæli. Hann fær að vera inní stofu, við ákváðum að það væri ósanngjarnt ef ég hefði hann inni hjá mér eða hún fengi að hafa hann inni hjá sér. Enda afrekuðum við þetta í sameiningu.

Hin fölnandi fegurð

2008-02-07T16:26:00.000Z

Ég er komin með svona lausa kjúklingahúð á hálsinn. En það er allt í lagi vegna þess að ég er að fara til Ítalíu næsta sumar. Þannig að mér er alveg sama.

Húsráð

2008-02-04T12:35:00.000Z

Litla Exem-Vaka vaknaði um miðja nótt sárkvalin af exemkláða. Ég hafði makaði hana í exemkremi og mýkjandi kremi og stokið henni blítt til að svæfa hana kvöldinu og nú þurfti ég að strúka henni aftur til að lina versta kláðann. En þar sem ég lá og reyndi að halda mér vakandi til að geta sinnt þessu fékk ég allt í einu hugljómun og fór og sótti rykdustarann til að strjúka henni með honum. Og hann virkaði svona líka ljómandi vel.

Fyrirboði?

2008-01-29T14:18:00.001Z

Það er rófulykt af puttunum mínum og búin að vera í allan dag. Af hverju veit ég ekki.

Á framfæri Lín?

2007-12-17T11:52:00.001Z

Hlerað samtal á bóbó, safni allra landsmanna sem ganga í jogginbuxum á álagstímum. Fer fram á milli háfættrar ljósabekkjaljósku í fínum pels og ungs ólétts indípars á kaffistofunni:

-Við erum með eina pólska.(háfætta ljóskan)
-Já, er það? (indíparið)
-Já, það er víst alveg nauðsynlegt þegar maður í námi og á barn.
-Já, hvað kostar það.
-Ég borga 750.- á tímann.
-Vá, maður ætti að spá í það.

Lausn

2007-12-10T09:06:00.000Z

Mér finnst að unglingspiltar sem ganga í nærbuxum sem eru dýrari en síðbuxurnar sem þeir eru í (og samt kosta þær sjaldnast minna en 15 þús) eigi bara að vera hreinskilnir og gera sjálfum sér og öllum sem þurfa að horfa á þá þann greiða að klæða sig í nærbuxurnar yfir síðbuxurnar.

Alfa alfa spírur

2007-12-06T08:41:00.000Z

Heita kannski ekki alfa alfa spírur heldur al falfa spírur.

Draumabrúðkaupið okkar

2007-11-27T09:28:00.001Z

Fór fram einhvern tíman þarsíðustu nótt. Mig dreymdi að við Eiríkur hefðum ákveðið að drifa í að gifta okkur og boðið til veislu en þegar líða fór nær dagsetningunni þá kom í ljós að við nenntum eiginlega hvorugt okkar umstanginu sem átti að fylgja.

Við höfðum ákveðið að gifta okkur á miðvikudegi eftir vinnu til að þurfa ekki að gera of mikið mál úr þessu öllu saman. en við höfðum þó boðið vinum og fjölskyldu til veislu um kvöldið. Þegar dagurinn rann upp nenntum við ekki að:

1. taka til
2. búa til veislumat
3. klæða okkur í sparifötin
4. mæta til prestsins
5. afbóka gestina

Og þetta ræddum við allt okkar á milli:

-Nennir þú að gera þetta?
-Nei.
-Ekki ég heldur.
-En þetta þarna?
-Nei.
-Ekki ég heldur.

Það fóru sem sagt fram nokkur svona samtöl í þessum draumi. Og það varð úr að við gerðum ekkert af þessu. Á endanum mættu gestirnir og þá lá ég útaf í hægindastól og nennti ekki að drattast á fætur sem var kannski gott vegna þess að ég var hvort eð er í gauðrifnum kjól, það var allt í drasli og ekki til neinn matur eða drykkir. Í draumnum var samt gaman að fá fólk í heimsókn.og það virtist svo sem ekkert fúlt að fá ekkert í gogginn.

Vaka tannlausa

2007-11-15T11:42:00.000Z

Vill ekki fá gervitennur þótt henni standi þær til boða.

Jólasveinaleigan

2007-11-13T16:52:00.000Z

Jólasveinarnir hjá jólasveinaleigunni Jólasveinum moka að eigin sögn inn milljónum á fólki sem virðist almennt orðið of latt til að leika sjálft jólasveina fyrir börnin sín. Þeir taka það fram að leigan hafi hækkað hjá þeim eins og öðrum en í stað þess að bera fyrir sig vísitölur og verðbólgur segja þeir:

Við verðum að eiga ofan í okkur þessa 11 mánuði sem við komum ekki nálægt mannabyggð.

Þessir jólasveinar svínokra sem sagt á fólki sem vill gera börnum sínum glaðan dag vegna þess að þeir nenna ekki að vinna ellefu mánuði ársins.

Vetrarfrí

2007-11-06T12:58:00.000Z

eEu dásamleg. sérstaklega ef þeirra er neytt fyrir norðan í snjó og teppayl. Á kafi í reyfurum, andrésblöðum og ástríksbókum. Menninguna sækir maður svo í smáskömmtum til höfuðborgar norðursins í formi kaffihúsa og leikhúsferða. Ekki það að maður þurfi á neinni borgaramenningu að halda dúðaður á milli fjalla í þröngum firði. Fjallasýn, nokkrar bækur og snarkandi pottofnar uppfylla svosem allar andlegar þarfir.

Ef þú býrð í miðbænum þá

2007-10-22T19:56:00.000Z

er pissað á húsið þitt
krota unglingar á húsið þitt
gerir fólk það upp við ruslatunnurnar þínar (og vekur þig með látum)
skilur sama fólk eftir smokk í garðinum þínum
skilur fólk eftir eitt af þessu eða allt þrennt á tröppunum þínum:

ælu
hálfétinn Hlöllabát
flatan bjór

Vaka og sófinn

2007-10-20T19:02:00.000Z

Vaka (7) var rétt í þessu að enda við að festa hausinn á sér í sófa. Hún er óvenju hausstór miðað við aldur.

Kúgunarpelsin

2007-10-03T09:56:00.000Z

Vaka (7) á leið í skólann (sagt með angistarsvip):

Mamma, verðuru að fara í loðkápunni?

Sönn saga

2007-10-01T21:05:00.000Z

Tvær gamlar skrukkur í kerlingapottinum í Vesturbæjarlauginni:

-Já, hún líkist meira í föðurætt.
-Já, já. Einstaklega ljótt fólk. svona framsett og undarlegt í laginu, eins og illa rúllaðar rúllupylsur.
-Já, já. Hann Ólafur er þannig.
-Hefur Halldóra fitnað?
-JJhhhááá (mjög langt innsogsjá). Mjög mikið.
-Ég ætlaði ekki að þekkja hana.
-Nei. Hún hefur fitnað.
-Hún er bara óþekkjanleg. Þetta er skelfilega ljótt.

Eiríkur og dömubindin

2007-09-25T22:48:00.000Z

Ef Eiríkur er beðinn um að grípa með sér á leiðinni heim pakka af dömubindum í stærðinni "normal" þá er það bara hending ef hann kemur ekki heim með stærðina "enormously giant elephant pussy diapers" (designed for lying down only since you will not be able to move around easily with this thing stuck between your legs).

Hann kann að lesa en ég held að hann kunni ekki að lesa á dömubindapakkningar.

Gluggaskafa er ekki það sama og ostaskeri

2007-08-07T18:01:00.001Z

Ég hef komist að því að slysið sem ég lenti í hérna um daginn er orðið eitt helsta aðhlátursefni fjölskyldu minnar (já, hún er andstyggileg). Ekkert þeirra virðist þekkja muninn á rúðusköfu og gluggasköfu.

Gluggasköfuslysið mitt hefur þótt hin mesta skemmtun og því líkt við ostaskeraslys Flóka litlabróðurs míns.

Ég sé mig knúna til að útskýra muninn á rúðusköfum og gluggasköfum fyrir þessum svokölluðu ættingjum. Rúðusköfur eru fisléttar með gúmmirönd að framan og það veldur mönnum yfirleitt ekki miklum sársauka ef ein slík dettur ofan á tærnar á þeim. Öðru máli gegnir með gluggasköfur sem eru meira en kíló að þyngd og búnar hárbeittu rakblaði að framan (notaðar til að skafa glugga, rúður og annað dótarí og í sumum tilfellum fætur) og er það alþekkt að gluggasköfur geta valdið mönnum þó nokkrum ónotum ef þær sporðreisast ofan í ökklann á þeim. Sérstaklega ef þær skilja eftir sig sentimetra djúp sár.

Slysum á borð við gluggasköfuslys er á engan hátt hægt að líkja við slys þar sem fólk sem haldið er fiktfíkn fiktar svo mikið við hlut (til að mynda ostaskera) að það festir á sér puttann í honum. Ég vona að þetta sé þá komið á hreint.

Ekki örvænta

2007-06-20T17:56:00.000Z

Þótt við séum lasnar þá liggjum við ekki í leti. þið getið innan skamms lesið dóma um "Eftirmynd Eiginmanns" e. Vivienne Wallington (kategoría:örlagasögur), "Kúreki með meiru" e. B.J. Daniels (ást&afbrot) og "Tilboð Luke" e. Lois Feye Dyer (ástarsögur).

Ég er að hugsa um að byrja á "Tilboði Luke" en aftan á henni segir: "Hann var síðasti maðurinn á jörðinni sem hún ætti að tala við. En Rachel Kerrigan þarfnast hjálpar tamningamannsins Luke McCloud þrátt fyrir að fjölskyldur þeirra hafi staðið í deilum í áratugi."

Eins og allir vita eru tamningamenn sérlega kynþokkafullir, sérstaklega þeir sem viðhafast í Montana og fátt jafn tilvalið til að vekja kynferðislega spennu og illdeilur fjölskyldna. Jafnvel Shakespeare gekkst við því, veit þó ekki hvaða álit hann hafði á tamningamönnum. Þar verðið þið að ráðfæra ykkur við sérfræðinga í enskum miðaldabókmenntum.

Þetta gerðist í sveitinni

2007-06-15T22:35:00.000Z

Mac Conlon og Susan Monroe hittust á ný eftir tíu ár og sló Susan Mac utanundir fyrir hjartasárið sem hann olli henni tíu árum fyrr. Þau nutu svo trylltrar ástar í óbyggðum Texas á meðan harðsvíraði suðurameríski glæponinn Ruala leitaði að þeim bakvið hvern kaktus í fylkinu. Einnig náðu þau að rífast og sættast (með tilheyrandi lamandi kossum og himnesku kynlífi) þrisvar áður en yfir lauk. Við Vaka fórum í sund, keyptum selkóp og ullarsokka á Geysi, grilluðum pulsur og meltum í heita pottinum fyrir svefninn.

Lauren McCrea bjargaði Ethan Brand frá því að verða úti og hann þakkaði fyrir sig með dásamlegu kynlífi áður en hann var handtekinn og færður fyrir dóm fyrir afbrot sem hann hafði ekki framið. Þegar hann snýr aftur ellefu mánuðum síðar, í hjartasárum, reynir Lauren að leyna tilvist Söru litlu (tveggja mánaða) fyrir honum og fær skammir fyrir þegar upp kemst. Þau hjálpast síðan að að hafa uppi á Söru litlu þegar henni er rænt og á leiðinni ná þau að njóta ásta a.m.k tvisvar. Þrá sem er svo sterk að hún yfirgnæfir allt, jafnvel það að barnið þitt er í höndum mannræningja, hlýtur að vera stórfengleg. Við fórum í Slakka og Vaka sát inni í kettlingakofanum í upp undir 90 mínútur og knúsaði óttaslegna kettlinga. Þar skoðuðum við einnig austurlenska risarækju og spiluðum mínígólf. Sumir halda áfram að pútta áður en kúlan stoppar, aðrir láta eins og það sé í fínu lagi. Dagurinn toppaður með grillborgurum og pottferð.

Cash McCall bregður í brún þegar hann sér Molly Kilpatrick og heldur að hún sé Jasmine sem hefur verið saknað í sjö ár. Áhrifin sem hún hefur á hann eru lamandi og koma honum á óvart. Molly sér strax eftir ráðabruggi sínu þegar hún sér hinn myndarlega Cash og finnur að þennan mann fær hún ekki staðist. Þau gera það tvisvar á milli þess sem þau lenda í lífshættu og leysa gömul morðmál. Við fórum í sund á Borg og sátum og störðum óttaslegnar á ógnvekjandi vatnsrennibraut á meðan sumir sögðu "ég get þetta" og "ég getettekki" til skiptis. Ákveðið var að bæta við sig ári áður en lagt yrði til atlögu við þetta skrímsli. Vorum svo búnar að fá yfrið nóg af grillmat og bökuðum pítsu í staðinn. Nauðsynlegt þótti að melta hana í pottinum.

Svo kom amma og hagaði sér eins og gamla nornin í Hans og Grétu áður en hún reynir að éta þau. Ef við hefðum verið þarna degi lengur hefðum við líklega sprungið með látum. Hún nýtti hvert tækifæri, á leiðinni heim píndi hún okkur til að stoppa í Eden þar sem ég þurfti að borða roastbeefsneið og súkkulaðiköku með rjóma. Ég hélt ég yrði ekki eldri. Vaka var látin éta snúð og ís og spurð hvort hún vildu ekki endilega fá skúffuköku með. Slapp líka með naumindum.

Eftir þessa viku get ég sem sagt vel mælt með súmarbústöðunum í Brekkuskógi og bókunum "Fyrirsát", "Hermaður&Herramaður" og "Faðerni óþekkt" frá Ásútgáfunni. von bráðar mun hér birtast dómur um ritið "Örlagaþræðir" frá sömu útgáfu (kategoría: ást og afbrot).

Það er orðið nokkuð ljóst

2007-06-05T18:36:00.000Z

Að veðurguðirnir hafa megnustu óbeit á óhóflegum fjáraustri mínum í hina ýmsustu garðvöru. Nýja grillið er líklega farið að ryðga inn að beini, fræin í pottunum drukknuð og ég þori ekki lengur að setjast í garðstólana þar sem þeir eru örugglega fúnir í gegn eftir rigninguna síðustu daga. Maður má bara þakka fyrir á meðan þeir drekkja manni ekki í refsingarskyni. Hvað kemur þetta þeim annars við?

Veðurguðirnir

2007-05-25T19:36:00.000Z

Virðast bara alls ekki kunna að skammast sín.

Gömlu kjánaprik

2007-05-22T19:09:00.000Z

Ég vona svo sannarlega að veðurguðirnir skammist sín fyrir uppátæki síðustu daga.

Spurningin sem hver maður verður að spyrja sig á úrslitakvöldi

2007-03-25T19:19:00.000Z

Hvernig er lyktin ofan í leðurbuxunum hans eiríks haukssonar eftir að sýningu lýkur?

Svona er þetta með flestar stóru spurningarnar í lífinu - það tekur á að spyrja þeirra og stundum óttast maður að svarið verði manni kannski um megn

Karlakvöld hestamanna í Mosó

2007-03-24T15:08:00.000Z

Þessir hestamenn. Þeir láta umræðuna ekki slá sig út af laginu. það er sko hefð fyrir fatafellum á karlakvöldum hestamannafélagsins Harðar og fatafellur skulu það vera. Þetta er reyndar óskiljanleg hefð þar sem karlarnir virðast vera of fullir á þessum kvöldum til að sjá hvað fer þar fram og hverjir eru á staðnum. Í Mogganum í dag er vitnað í Martein Hjaltestedt, formann Harðar þar sem hann segist ekki muna hvort fatafellurnar þetta árið fóru úr að ofan eða hvers lenskar þær voru.

Það er líka hefð fyrir fatafellum hjá heklklúbbnum Herðubreið en við erum búnar að fá nóg af pungsignum Slövum. Við viljum ferskt blóð. Íslenskt kjöt. Við viljum Martein Hjaltestedt og nokkra vini hans úr hestamannafélaginu Herði. Í reiðstigvélum og lopapeysum og engu öðru. Þeir fá greitt í smákökum, eins mörgum og hægt er að tylla í hverja rassskoru.

ungfrú skögultönn

2007-03-20T21:34:00.000Z

er sex og hálfs árs gamalt gerpi með lausa framtönn sem skagar út um kjaftinn þannig að hún lítur út eins og nítjándualdar vasaþjófur. og það er ekki bara útlitið. margt annað í fari hennar fær mig til þess að efast um innrætið og hvort það að gera sitt besta dugi nokkuð í þessu tilviki. ég er sárlasin og ligg fyrir. þetta veit ungfrú skögultönn mæta vel og hefur sýnt einhverja tilburði til að vorkenna mér þótt sú samúð risti greinilega ekki djúpt.

nú var ég eitthvað að reyna að vera indæl við hana og kleip laust í kinninna á henni og sagði að hún væri eins og marsípan (sem hún var). hún spurði mig hvort nefið á henni væri líka eins og marsípan og ég sagði svo vera og fékk að kyssa hana á nefið. því næst tróð hún vísifingrum sínum á bólakaf hvorum upp í sína nösina og þegar þeir sneru aftur með feng var mér boðið upp á marsípanhor. ég afþakkaði aumlega og hryglandi en var of slöpp til að veita næga mótspyrnu.

þótt nafnið gefi til kynna að marsípanhor sé framleitt úr marsípani þá get ég fullvissað ykkur um að það bragðast mun meira eins og hor og fyrir marsípanunnendur mæli ég frekar með venjulegu marsípani. nú, sem uppalanda þótti mér ótækt að bregðast ekki við með einhverjum hætti (og líka þar sem mér var ógnað með fleiri marsípanafurðum) og ég hótaði ákveðnum aðgerðum sem ég hef oft hótað áður. þær hótanir höfðu áhrif, eins og alltaf áður og því hefur enn ekki reynt á þær. en þegar fröken marsípantrutt var háttuð, búið var að bursta tönnina og hún lá uppí rúmi og slefaði á koddann sinn varð mér hugsað til uppeldisaðferða minna og hvort hegðun skögultruttar stafaði af erfðum eða innrætingu og allt í einu rifjaðist upp fyrir mér inntakið í gömlu leiðindamáltæki sem túlka má á þennan veg: Fólk sem hótar börnum sínum að það muni setjast á andlit þeirra og prumpa á skilið að éta hor.

Hvenær veit maður að umræða er ekki lengur umræða heldur hystería?

2007-02-24T11:38:00.000Z

Er það þegar stelpur fá ekki lengur að fara með pöbbum sínum í karlaklefann þótt þær séu ekki nema sex ára og treysta sér ekki einar í kvennaklefana og pöbbunum er bent á að það sé eiginlega ekki hægt í ljósi umræðunnar?

Heltekin lamandi skömm

2007-02-23T10:31:00.000Z

Það eru víst hræðileg mistök að lesa lokaritgerðir yfir áður en maður skilar þeim inn. en sumir þeir læra ekki nema af eigin reynslu. Hún getur verið mjög kvalarfull.

Þjóðarbókhlaðan

2007-02-08T13:37:00.000Z

Það er maður í tölvunni ská á móti mér að reyna að pota úr sér framheilann gegnum nefgönginn . Með blýanti.

Lokaspretturinn

2007-01-09T23:06:00.000Z

Hvernig í ósköpunum er hægt að vera svona latur á lokasprettinum? það mætti líkja mér við mann sem skráir sig í maraþon og hleypur 41 kílómeter en sest svo niður á bekk, þegar hann á rúman einn km eftir í mark, ekki vegna þess að hann er sprunginn heldur vegna þess að honum var bara farið að leiðast of mikið undir lokin.

Skammast mín, skammast mín, skammast mín.

Ég vildi óska þess að það væri einhver hérna sem gæti rassskellt mig.

Ég á það skilið.

Bara kötturinn hér, get reynt að rassskella sjálfa mig með honum.

Andlegt gubb

2007-01-09T22:31:00.000Z

á blaði
brátt á leið til leiðbeinanda
akademískt sjálfsvíg

Vaka og jólasveinarnir

2006-12-12T21:26:00.000Z

Vaka sem ekki má neitt aumt sjá vill endilega gefa jólasveinunum sem setja dót í skóinn hennar eitthvað á móti. Þeir fá föndur og aðdáendabréf og í dag reyndi hún að fá mig til að kaupa jólasveinastyttu til að gefa jólasveini dagsins.

Já, það er ritgerðatími

2006-12-07T10:57:00.000Z

Orðabókin mín á netinu reynir dag hvern að selja mér prófarkalestur:

R I T G E R Ð A T Í M I
Notaðu leiðréttingaforritið Málfar til að stuðla að rétt stafsettum ritgerðum.

Ég vænti þess að forritið Málfar hafi stuðlað að þessari textagerð.

Ég bíð spennt eftir forritinu Wittgenstein sem stuðlar að óskiljanlegum ritgerðum sem hljóma svo gáfulega að kennarar neyðast til að gefa þeim hæstu einkunn. Það gæti verið að einungis þyrfti að gera smávægilegar breytingar á forritinu Málfar til að láta þann draum rætast.

Gyðatrutt

2006-11-26T15:09:00.000Z

heitir nágranni minn nú. en hét áður Gyða eitthvað væmið. þessu fann ég upp á eftir að hafa kallað hana gilitrutt í rúmt ár. ég er svo ánægð með þetta að ég flissa sjálf upphátt í hvert skipti sem ég segi nýja nafnið.

ég verð að leggja heilann í bleyti og finna upp á nýjum nöfnum handa öllum sem fara í taugarnar á mér, þetta virðist vera mjög terapeftískt. í nótt þegar Gyðatrutt var með gelgjupartí frammá stigangi þá hafði ég enga löngun til að fara fram og kvarta (þegar dyrabjöllunni okkar var hringt í þriðja sinn klukkuna að ganga þrjú um morgunn) vegna þess að ég þurfti bara að hugsa nýja nafnið til að fanga gleði mína á ný.

Hér fylgir listi með nöfnum óvina minna, endilega hjálpið til:

#Gyy&(/$
$6B/#"!Ö
Y/=%VR%
BGFRD&&&
&H(I))%
&/BGY%&(
&/%$$ce#

geri ráð fyrir að þið kunnið morse.

Stundum hefur maður ekkert að segja

2006-11-22T23:08:00.000Z

Og oft kemur í ljós eftir á að einmitt þá hefði verið gáfulegt að halda kjafti.

Nýjustu Ba-fréttir

2006-11-20T20:58:00.000Z

Mig hefði aldrei grunað að ég væri svona illa gefin. Sem þýðir eiginlega að ég sé of vitlaus til að gera mér grein fyrir því hvað ég er heimsk.

Krútt!

2006-11-17T23:30:00.000Z

Ég er að hugsa um að láta græða hár í andlitið á Vöku.

Næringargildi ritgerða

2006-11-17T17:20:00.000Z

Bö!-ritgerðin mín sem ég hef ákveðið að endurnefna þar sem fólki mun bregða töluvert í brún þegar það les hana, er skrifuð með aðstoð mikils tekexs. Það er ýmislegt í þeirri ritgerð sem bendir til að ekki sé nægilegt magn af næringarefnum og orkuefnum í einum tekexpakka á dag til að knýja meðalheila. Af innihaldslýsingunni að dæma eru enginn svokölluð E-efni. Það gæti fengið mann til að hugsa. Ef maður æti eitthvað annað en tekex.

Útundan

2006-10-24T21:07:00.000Z

Ef ég væri gömul stjórnmálakempa og mig grunaði sterklega að ég hefði aldrei verið hleruð þá væri ég sármóðguð og vildi gjarnan að það yrði leiðrétt sem fyrst.

Menntaðir eða ekki, þeir eru kolóðir!

2006-10-16T20:54:00.000Z

Fyrst koma fréttir af því að menntaðir lögreglumenn hafi miklar áhyggjur af því hversu margir ómenntaðir starfa innan lögreglunnar sem skýrist að mestu af því að lögregluskólinn fær ekki nægilegt fjármagn til að mennta nógu margamlögreglukandídata. Menntuðu lögreglumennirnir kvarta sáran undan þeim ómenntuðu sem þeir telja ekki valda starfinu og séu beinlínis hættuvaldar.

Tíu dögum síðar koma fréttir af því að lögreglumenn telji brýnt að þeir fái sem fyrst skammbyssur til að vappa um með.

Heilabrotin:

Ætla þeir í alvörunni að skjóta ómenntuðu lögregluþjónana?
Eru menntuðu lögreglumennirnir ekki hræddir um að ómenntuðu lögreglumennirnir skjóti þá fyrst þeir eru búnir að dissa þá svona í fjölmiðlum?
Voru það ómenntuðu eða menntuðu lögreglumennirnir sem vildu fá byssur?
Hvaða menntun eru þeir með?

Andlegir sem annars konar

2006-10-12T23:35:00.001Z

Tvífararnir þessa vikuna eru pabbi minn og Jean Arthur Rimbaud.

Mér vitandi eignuðust þeir Verlaine ekki barn saman en einhvern veginn komust þessi fúllyndu gen vestur á firði.